Italica follilusorum turma, quinquaginta tribus annis postquam primum cantharum argenteum consecuta erat, summum praemium sibi denuo comparavit. Hesterna enim nocte grex caeruleus cum Britannis certans, postquam contentio aequo exitu (1-1) desiit ac nihil novi, temporibus superadditis confectis, nimirum evenit, adversarios 4-3 iactibus poenalibus profligavit.
Primum Dominicus Berardi in Anglorum portam follem impegit; deinde Leonardus Bonucci, qui punctum in prima certaminis parte adeptus iam erat, rete iterum violavit; postremo Fridericus Bernardeschi ultimo iactu poenali gloriosae catervae nostrae victoriam dedit.
