O tempora, o moresIn urbe Augusta Taurinorum tres operarii, grue delapsa, interierunt

Praeterito die Saturni immanis calamitas Augustae Taurinorum facta est: in urbis regione inter meridiem et orientem solem magnus tolleno, repente collabens, in septem tabulatorum domum matutino tempore proruit. Qui praecipitans in quattuor partes discessit. Quam ob stragem tres operarii, qui laborem in summo grue exercebant, ex alto humi decidere machinaeque ruinis oppressi morte violenta periere. His, qui letalibus plagis  acceptis vitam amisere, nomina sane Robertus Peretto, Marcus Pozzetti, Philippus Falotico. Quorum primus quattuor et quinquaginta annos, alter vero duo et quinquaginta annos, tertius postremo viginti tantum annos habebat. Una mulier duoque viri consauciati denique sunt.