O tempora, o moresPapa Franciscus Portam Sanctam Basilicae Sanctae Mariae de Collemadio aperuit

In urbe Aprutii capite basilica nobilissima ac splendidissima, quae Sancta Maria de Collemadio nuncupatur, nimirum exstat. In qua exuviae Caelestini PP. V, quem Clemens V eius successor in Sanctorum caelitum numerum anno MCCCXIII rettulit, vero asservantur summaque pietate percoluntur. Pontifex ille ex eremo celsus sacram aedem, de qua supra diximus, indulgentiam plenariam a.d. III Kal. Oct. a. MCCXCIV adiunxit, per Bullam, a verbis Inter Sanctorum incipientem, sane statuens ut «omnes vere penitentes et confessos», qui inter dies XXVIII-XXIX mensis Augusti, seu a vesperis festivitatis Decollationis Sancti Ioannis Baptistae vigiliae «usque ad vesperas festivitatem ipsam immediate sequentes, ad praemissam ecclesiam accesserint annuatim et omnipotentis Dei misericordia et beatorum Petri et Pauli apostolorum eius auctoritate confisi» absolveret «a culpa et poena, quam pro suis merentur a baptismo commissis omnibus et delictis». Quamobrem Papa Franciscus, tanti decessoris suis vestigiis insistens, basilicam Sanctae Mariae de Collemadio, sollemni recurrente die quo christifideles debitis dispositionibus praediti indulgentia plenariam a Caelestino V concessam acquirere possunt, peregrinationem heri peregit ipsiusque templi Portam Sanctam rite aperuit.