Romae Papa Franciscus magno ex omnibus nationibus conventui, quem communitas Sancti Aegidii apparavit ut tres per dies episcopi catholici, ceterarum procuratores Ecclesiarum christianarum, variarum antistites religionum, Civitatum moderatores de concilanda pace inter se colloquerentur, finem sollemniter heri imposuit. In amphitheatro Flavio, quod Colosseum dicitur, Romanus Pontifex una cum christianarum ecclesiarum communitatumque legatis ut gentium controversiae componerentur atque res tam in Ucraina quam in universo terrarum orbe tranquillaretur primum Iesum Regem Pacis obsecravit, ardentem orationem, in qua inter alia bellum omnium matrem miseriarum appellavit, deinde habuit.
