Heri, die festo Rei Publicae Italicae, Mediolani Robertus Gervaso, post diutinum morbum, extremum vitae spiritum edidit: clarissimus scriptor et diurnarius octoginta duos annos excesserat. Cuius nomen grato commotoque animo est prosecutus Sergius Mattarella, qui illum praedicavit «virum humanitate doctrinaque imbutum atque in diurnariorum arte culturalique Civitatis nostrae vita diu principem».
Ansgarii Wilde aphorismorum ac Martialis epigrammatum cultor, Robertus Gervaso Italicos mores, Horatiano modo, facete castigavit. Cum Indro Montanelli, cui intima amicitia coniungebatur, primos sex libros De Historia Italiae nimirum scripsit. Inter mirabilia eiusdem brevia dicta est memorandum illud: «Non sumus populus sanctorum nec poetarum nec artificum nec nautarum: sumus vero populus piscium in dolio». Vale, Roberte dilecte, atque nobiscum in scriptis tuis adhuc colloquere.
