In serenissima urbe Venetia Amos Luzzatto, clarissimum Hebraismi columen ac litterarum Italicarum lumen, ad superos heri evolavit: inclutus scriptor opusculique altioris doctrinae auctor nonaginta duos annos excesserat. Qui, Dantis Luzzatto celebris rabbini e materna progenie nepos (Samuel David Luzzatto, Italicus Iudaicorum Studiorum [Theodisce Wissenschaft des Judentums] repraesentans, abavus paternus autem fuit), anno 1939 ob nefandas phyleticas leges in Palestinam una cum matre avisque exsulatum ivit. Romam 1946 reversus, Amos Luzzatto Factioni Communisticae Italianae nomen dedit: tota vita Hebraeum sinistrae vel Communistam Hebraice loquentem se appellavit itemque contra omne razismi genus strenue certavit.
Magni nominis chirurgus academicusque, qui inter alia Sinistram et quaestionem Hebraicam (Italice Sinistra e questione ebraica), Praeter Iudeorum vicum (Italice Oltre il ghetto), Hebraeorum Locum (Italice Il posto degli ebrei) sapienter scripsit, Luzzatto ab anno 1998 ad annum 2006 Unioni Communitatum Hebraicarum Italicarum (UCEI) praefuit. Cuius nomen grato animo est prosecuta Ruth Dureghello, Communitatis Hebraicae in Urbe praeses, quae illum virum potissimum aptum ad internoscenda bona a malis nimirum praedicavit.