Horror ingens indignatioque Africam Australem perstringere non desinunt. Die 26 mensis Augusti Simon Ndyalvane, qui Scorpio appellatur, Caylene Whiteboy, Voster Netshiongolo biocolytae in Ioannesburgi suburbio Eldorado Park nuncupato contra Nathanaelem Julies, syndromaticum Downianum, ignitos globulos pyroballistula miserunt: puer sedecim annos natus occisus est dum crustulum edebat.
Tres custodes, qui in carcere sunt, Nathanaelem in manuballistatione inter criminales greges interfectum fuisse dixerunt. Qui autem sunt coarguti a pluribus testibus illos puerum sirenarum sonitu inquietum enecavisse declarantibus. Nathanaelis crudelis trucidatio populi iram movit. Tumultus praesertim Ioannesburgi orti sunt: hic est dies nonus quo manifestantes iustitiam pro Nathanaele elata voce petunt.