Angelopoli in aedibus suis Volfgangus Petersen, unum et octoginta annos natus, septem abhinc diebus, cum pancreatico cancro laboraret, inter uxoris amatissimae amplexus placide exspiravit. Cuius tamen mors nudius tertius nuntiata est. Is, cinematographicus moderator natione Germanus, magni nominis pelliculas disposuit sedecim, inter quas “Historia interminabilis” (Theodisce Die Unendliche Geschichte), “Virus mortiferum” (Anglice Outbreak), “Aeria classis prima” (Anglice Air Force One), “Troia” (Anglice Troy) sane eminent. Sub quo duce Georgius Clooney, Clintus Eastwood, Harrisonus Ford, Bradleius Pitt, praeclari actores, in scaena partes egerunt.
18 Agosto 2022
