O tempora, o moresAve aeternumque ave, Iulia Powell

Iulia (vulgo Julie) Foster, quae, cum Erico Powell anno MCMLXXXVIII nupsisset, a coniuge cognomen deinde sumpsit, Olivae, in aedibus suis, propter cardiaci intermissionem motus a. d. VIII Kal. Nov. mortalitatem exuit quinquagesimum agens annum. Quae, postquam interretiale de arte coquinaria diarium, cui nomen Anglicum The Julie/Julia Project dedit Iuliam Child, coquam celeberrimam, habens auctorem, quo faceret hoc, scribere inceperat, ea anno MMV librum, qui “Iulia et Iulia: CCCLXV Dies, DXXIV Culinarum Praecepta, I Parvula Diaeta Coquina Instructa” (vulgo Julie & Julia: 365 Days, 524 Recipes, 1 Tiny Apartment Kitchen) inscribitur, sane composuit litterarumque formis consignatum vulgavit, quo insignem famam adepta est ac laudem. Quem quattuor post annis, una cum memorialibus “Vita mea in Gallia” (vulgo My Life in France) a Iulia Child conscriptis, Nora Ephron taeniae cinematographicae utriusque mulieris illius gesta effingenti aptavit, in qua unius partes Aemilia Adams egit, alterius vero Maria Ludovica Streep.