In Anglia Maria Rosa Antognazza, cum gravi ac brevi morbo iaceret, a. d. V Kal. Apr. pie placideque decessit anno aetatis suae duodesexagesimo. Quae Mediolani, in Universitate Catholica Sacri Cordis Iesu, inter Sophiae Vanni Rovighi discipulas eminuerat atque philosophae gradum dignitatemque merita erat, ea magnam laudem sibi comparavit, philosophiam in Regio Collegio Londinensi tradens. Maria Rosa, mulier omni eruditione ornatissima, cum totam Godefridi Guilelmi Leibniz vitam diserte et copiose exposuisset illiusque opera sapienter explicavisset, sempiternam gloriam praeterea acquisivit.
