O tempora, o moresIn Slovacia servus Vladimiri vicit

In Slovacia duodeseptuaginta fere centesimae eorum, qui suffragii ius habent, de popularibus legatis creandis sententiam die Saturni dedere. Democratae Sociales, quos Robertus Fico, Gubernii quondam praeses, moderator, suffragiorum circiter tres et viginti centesimas sibi conciliaverunt ideoque, cum qui Liberales nominantur, duodeviginti tantum centesimas accepissent, nimirum vicerunt. Quorum dux, cum et Vladimiri, crudelis Russorum tyranni, servus et Victoris, principis Hungarorum administri rectorque extremarum partium dexterarum, quas vulgo Fidesz vocant, amicus esset, se Ucrainis arma non amplius missurum esse palam dixit.