O tempora, o moresHenricus Kissinger fataliter mortuus est

Nudius tertius Henricus Kissinger, cum Cantii, in Connecticutae urbe, vitam degeret, inter suos animam efflavit, unum et centesimum agens annum. Adhuc iuvenis in academicum doctorum coetum adscitus, politica disciplina, quae a pragmatismo nominatur, atque summi strategi arte sane excelluit. Ab anno MCMLIX ad annum MCMLXXVII, primum consiliarii a patria securitate, deinde praefecti publicis Foederatarum Americae Civitatum negotiis gravissimus gerens munus, Richardo Nixon et Geraldo Ford, summis rectoribus, adiutricem operam navavit. Anno MCMLXXIII Kissinger, quamquam Americanae nationis amplificandae eiusdemque imperii bellici propagandi fautor esset, Nobelianum pacis Praemium accepit. De quo dici fortasse potest eum ipsum se metui quam diligi maluisse.