O tempora, o moresMagnum Pii La Torre simulacrum

Hodie duo et quadraginta complentur anni, ex quo in urbe Siciliae capite Pius La Torre, clarissimus Communistarum factionis sodalis, opificum corporatorum doctrinae fautor popularisque legatus legibus ferendis, una cum Rosario Di Salvo a gregalibus mafianis necatus est. In cuius anniversarii funeris diei pervigilio Panormi magnum mirumque civilis illius viri simulacrum, quod Inguarus Scalisi Palminteri in una ex scholae parietibus, quae a Victorio Emmanuele III rege nomen trahit, affabre pinxit, adstantibus Francisco La Torre, Aloisio Ciotti, Mauricio Landini, Rosa Bindi, Vito Lo Monaco, Antonello Cracolici ac professoribus scholasticisque permultis, primum ad spectandum propositum est.