Die XIV huiusce mensis Augusti, in pervigilio festi Beatae Mariae Virginis in caelum receptae, Gena Rowlands, cui verum nomen Virginia Catharina, cum multos iam annos morbo morbo Alzheimeriano laboraret, domi suae prope urbem Fontes Palmarias, vulgo Palm Springs, e vita excessit anno aetatis quarto et nonagesimo. Quae compluribus in pelliculis, iis praesertim a Ioanne Cassavetes, eiusdem viro, cinematographica arte impressis, primas vel secundas partes optime egerat, ei anno MMXVI Academia Silvae Acrifoliensis praemium Ansgarianum honoris causa tribuit. Neque denique silentio praetereundum est Petrum Almodóvar taeniam cinematographicam, cui titulus originalis Todo sobre mi madre, Latine “Omnia de matre mea”, illi ipsi Genae necnon Elisabethae Davis ac Rosae Mariae Schneider dicavisse.
16 Agosto 2024
