Heri vesperi sollemnes exsequiae, ingenti hominum adstante multitudine, Roberto De Simone, Neapoli die Dominica, sexta videlicet mensis Aprilis, mortuo, in maximo urbis Campaniae capitis templo ad tanto viro parentandum persolutae sunt. Cum anno MCMLXVII musicorum sodalitatem populari cantui tradendo provehendoque, vulgato nomine Nuova Compagnia di Canto Popolare, una cum Eugenio Bennato, Carolo D’Angiò et Ioanne Mauriello condidisset, Robertus De Simone, qui iam vivens egregia spectaculi theatrici dispositoris, musicologi compositorisque fama circumdatus est, aeternam sibi gloriam, mirabile drama melicum, cui vulgo titulus La gatta Cenerentola (Latine “Catta Cinerentula”), scribendo eidemque modos aptando, nimirum paravit. Ave aeternumque ave, magister incomparabilis, cuius memoria pie inviolateque servabitur. Sit humus cineri non onerosa tuo; in pace sempiterna requiesce.
10 Aprile 2025
