Hesterno die, vicesimo quarto scilicet mensis Iulii, Georgius Karácsony, civilium rerum peritus magisterque urbis Budapestini, omnes per nuntiolum tum in Prosopobiblio tum in Instagrammate scriptum certiores fecit se suspectum esse inquirentibus Hungaricis. Notum quidem est a. d. IV Kal. Iul. virum illum, cum nefariae de interdicendis hominum homosexualium, bisexualium transgenerumque pompis – quas Anglice Pride dicunt – legi fortiter repugnaret, quam mense Martio oratorum popularium coetus, Victore Orbán iubente, punctis longe plurimis sanxit, maximum huiusmodi processum in urbe Hungariae capite disposuisse. Proxima vero hebdomada Georgius, qui se suspicione pro libertatis pretio putare eademque gloriari declaravit, a biocolytis interrogabitur.
25 Luglio 2025
