Die Saturni, undevicesimo scilicet mensis Iulii, nuntiatum est Motyae, qua in insula, prope Drepanum sita, opulenta Phoenicium colonia celebrisque antiquissimis temporibus floruit, alteram statuam Graecam, cum anni elapsi essent undequinquaginta a magnifica Ephebi effigie inventa, ex effossionibus, quas illo in loco Panormitanae studiorum Universitatis archaeologi, Paula Sconzo et Aurelio Burgio ducibus, duo iam amplius lustra faciunt, nimirum emersisse. Haec statua, septuaginta duo centimetra alta et capite, collo, brachiis superioreque trunco mutila, quae, marmore affabre sculpta, ad saeculum quintum ante Christum natum pertinet, iuvenem repraesentat mulierem, eleganti chitone ac pallio, vel Graece ἱμάτιον, indutam.
21 Luglio 2025
O tempora, o moresMirum inventum archaeologicum
Agitur de Graeca mulieris cuiusdam statua ex marmore ficta, quae in insula Motya est reperta
