O tempora, o moresSaevissima procella

Primis horis diei Saturni, vicesimo quarto scilicet mensis Augusti, cum ex improviso violenta tempestas coorta esset, ingentes pluviae et continuae, cum grandine caelo decidentes, in Flaminiae terris graves ruinas maxime ediderunt atque complurium urbium oppidorumque litoreorum, Arimini praesertim ac Ficuclarum, incolas, necnon peregrinatores voluptuarios iis in locis commorantes, acriter vexaverunt. Ad hoc denique praetereundum non est Mediolani Maritimi, in celebri oppidi Ficuclarum vico, ducentas sexaginta quinque arbores ventorum, centum viginti chiliometrorum horalium celeritate, imbriumque impetu evulsas esse.