Die Sabbato, sexto decimo videlicet mensis Augusti, Iosephus Baudo, qui deminutivo nomine vulgo Pippo nuncupabatur, Romae, cum in quodam valetudinario decumberet, hac de vita placide migravit undenonagesimo aetatis suae anno. Militelli, in antiquo Siciliae oppido florentique, natus, per lustra amplius decem innumeras emissiones ex Radiophonica Televisificaque Statione Italica, quam compendiariis litteris RAI appellant, optime moderatus est. Cum vero de tanti hominis exitu audiverunt, iuvenes et senes, viri et mulieres, Civitatis rectores et cives universi acerbo affecti sunt maerore.
18 Agosto 2025
