O tempora, o moresGeorgius Armani ad superos avolavit

Hesterna die Georgius Armani, cum unum et nonaginta annos natus esset, Mediolani inter suorum amplexus lacrimasque naturae reddidit debitum. Qui, domo Placentia, quindecim per lustra in urbe Langobardiae principe vitam degit ibidemque, cum anno MCMLXXV celeberrimam condidisset vestificinam, maximam laudem ac famam sibi peperit: quinque decenniis magnificas vestes confecit easdemque viris mulieribusve claris, e. g. Richardo Gere, Sophiae Loren, Thomae Cruise, Dianae Keaton, Iuliae Roberts, induit. Quamobrem non est mirandum si omnes, qui Georgium Armani, summi operis vestiarii regem verumque elegantiae arbitrum, obiisse audiverunt, magna sunt affecti maestitia.