Die Sabbato, quarto videlicet mensis Octubris, Summus Pontifex in privata Aedium Apostolicarum bibliotheca, adstante Edgario Peña Parra, archiepiscopo titulo Teleptensi eodemque altero a Cardinali publicis Ecclesiae negotiis praeposito, primum magisterii sui documentum nominatim subsignavit. Praeterea iussit ut huiusmodi documentum, seu adhortatio apostolica, quae a verbis Dilexi te incipit agitque de amore in pauperes habendo, proximo Iovis die evulgeretur. Quae eodem illo die in Vaticana diurnariis edocendis sede publice explanabitur.
