In urbe Roma Mauritius Calvesi, eximius artis criticus historicusque, ad superos heri evolavit: magni nominis academicus nonaginta duo annos excesserat. Lionelli Venturi et Caroli Iulii Argan discipulus, historiam artis primum in Panormitana Studiorum Universitate, dein in almo Urbis Studio egregie et optime tradidit. In studiorum cursus exordiis de Hannibale ac Ludovico Carracci, Baroco Lyciensi, Caravagio mire scripsit. Anno 1966 opus potissimum suum, cui titulus Le due avanguardie. Dal futurismo alla Pop Art, typis primum edidit.
Calvesi inter primos fuit qui neoavanguardiam nimirum tractavit atque modernos pictores, sicuti, exempli gratia, Afrum Basadella, Vascum Bendini, Albertum Burri, Marium Schifano, plurimi aestimavit et carissimos habuit. In ephemeridibus L’Espresso et Il Corriere della Sera nuncupatis rubricam de arte diu curavit. Inter annos 1986 et 2001 periodicum mensile Art & Dossier inscriptum praeterea moderavit. Vale, incomparabilis magister summique ingenii, et in doctis scriptis tuis cordibus nostris adhuc loquere.