Kalendis huius mensis Novembris Aloisius Berlinguer, cum diutino gravique morbo laboraret, in Senae, inclitae Tusciae urbis, valetudinario extremum spiritum effudit. Qui Henrico, supremo nostratis Communistarum factionis moderatori, erat, ut Ciceronis verbis utar, «frater […] cognatione patruelis, amore germanus», is, cum illis partibus nomen suum inde a iuventute dedisset posteaque in senectute Democratis se aggregavisset, Italicam Civitatem scientiae virtutisque luce illustravit. Ter popularis legati, semel et senatoris et deputati legiferi Europaei munus optime obiit. Sed anno MM, dum Publicae institutioni provehendae administri officium exsequitur, maximam famam sibi conciliavit: rogavit enim et obtinuit ut scholae privatae publicis exaequarentur.
3 Novembre 2023
