Hoc anno eventus faustissimus ac memoratu perquam dignus recolitur: scilicet quartum decimum expletum lustrum, ex quo Mediolani, in urbe Langobardiae capite, domus libris edendis, cui vulgo nomen Feltrinelli, ortum habuit. Quo sollemnius memoria illa anniversaria celebraretur, celeberrimae societatis librariae rectores, Caroli Feltrinelli, Ioannis Iacobi filii, consilio et iussu, ut in principibus Italiae urbibus, necnon Hispaniae ac Germaniae, magni conventus vetustis recentioribusve litterarum monumentis plane cognoscendis haberentur, sapienter disposuerunt. Praeterea quinque et viginti praestantissima opera, decora elegantique veste typographica exornata, typis rursus excudenda curavent. Quod quoque de perinsigni fabula historica, quam Iosephus Tomasi, ex Lopadusae principibus et Palmae Montis Clari ducibus, composuit et vulgo Il Gattopadro (Latine “Felis Pardalis”) inscripsit, nimirum statuerunt.
14 Aprile 2025
