Diebus 29-30 praeteriti mensis Septembris Ivanus Scalfarotto, Italiae Vivae factionis legatus ac Ministerii Negotiorum Externorum et Cooperationis Internationalis subsecretarius, Varsoviam adivit atque, concilio cum Raphaele Weber et Simone Szynkowski viceministris habito, de migrantibus, regiminis adversariis in Belorussia vexatis, oeconomicis relationibus inter Poloniam et Italiam est collocutus. Qui cum Anna Machińska, plebis defenditrice vicaria, est postea congressus gravique de Polonarum homosexualium, transexualium, bisexualium, intersexualium personarum condicione sane tractavit.
Hanc vero civium Lgbti+ iurium conculcatorum quaestionem Farnesini Dicasterii subsecretarius, in colloquio percontativo cum Andrea Bielecki diurnario habito et in magni nominis ephemeride conservativa Rzeczpospolita die 7 vertentis mensis Octobris typis edito, luculenter diserteque iterum exposuit.