Romae Henricus (Italice Arrigo) Levi in valetudinario, quo aliquot ante diebus receptus erat, extremum vitae spiritum edidit: celeberrimus diurnarius televisificarumque emissionum conductor nonaginta quattuor annos excesserat. Cuius nomen grato commotoque animo est prosecutus Sergius Mattarella, Italicae Rei Publicae praeses, qui illum praedicavit «diurnalem scriptorem doctum et exquisitum» atque «magnarum aetatis nostrae rerum gestarum narratorem acutumque explanatorem».
De Hebraica gente ortus, anno 1942 ob perniciosissimas leges phyleticas in Argentinam una cum parentibus suis exsulatum ivit. Strenuus ethicarum laicarumque virtutum defensor, Henricus Levi, qui in quinquennio 1973-1978 ephemeridem La Stampa est moderatus, fidus Caroli Azeglio Ciampi ac Georgii Napolitano, Rei Publicae Italianae praesidum, consiliorum socius fuit et adiutor. Scriptor feracissimus, viginti sex libros typis exscribendos curavit.
