In tabellae latebra plerique Philippini suffragii ius habentes Ferdinandum Marcos, qui Bongbong dicitur, summum Civitatis moderatorem die Lunae delegerunt. Etenim vir ille civilis, Ferdinandi maioris, intolerandi tyranni quondamque Philippinarum Reipublicae praesidis, filius et Imeldae Romuáldez, quae fama non inferior fuit quam maritus suus, ex sententiis latis sexaginta fere centesimas sibi conciliavit, alios novem devincens competitores.