O tempora, o moresKelly Preston artium mundus supremum vale dicit: actrix quinquaginta septem annos habebat

Mortis nuntium Ioannes Travolta, eius maritus, maerens heri dedit

Ex Ioannis Travolta Instagram

Hustoniae, in eminenti Texiae urbe, Kelly Preston mamillarum cancro die 12 vertentis mensis decessit: indutrix et actrix, nobilis praesertim claraque ex Marnie Mason persona suscepta in pellicula cinematographica ab Ivano Reitman moderata, cui est titulus Fratres gemini (Anglice Twins), quinquaginta septem annos excesserat. Cuius mortis nuntium Ioannes Travolta, artifex, cantor saltatorque, matrimonio cum eadem ab anno 1991 coniunctus, maestissime heri pertulit.

«Summo cum dolore – sic in Instagram nimirum scripsit – vobis nuntio pulcherrimam uxorem meam cum mamillarum cancro, contra quem duos per annos pugnavit, proelio esse victam. Illa innumerarum amore subsidioque personarum audacter dimicavit».