Die Mercurii superiore Baracus Obama, qui Foederatas Americae Civitates inter annos MMIX et MMXVII bis rexerat, Hispanicos Donaldi Trump suffragatores evangelicales prompte lacessiit. Quod vetus Americanae Rei Publicae moderator, dum in emissione radiophonica, cui “Sodalicium de ientaculo praebendo” (Anglicis verbis The Breakfast Club) titulus, recentissimum librum suum “Terra Promissa” (Anglicis verbis A Promised Land) inscriptum exponebat, sane fecit.
Obama inconstantiam, quam Hispanici evangelicam fidem profitentes in praesidentiali electione die III vertentis mensis Novembris habita nimirum praestiterunt, diserte patefecit dicens: «Qui vero plus Donaldi Trump sententiis de abortu ac matrimonio inter eiusdem sexus personas quam phyleticis comtumeliis ab illo in Mexicanos iactis nimirum tribuunt».