O tempora, o moresNeapoli autographa Iacobi Leopardi epistula in publico primum exhibita

Chirographum illud, ad Carolum Emmanuelem Muzzarelli missum, apud Romanam domum auctionariam “Finarte” venum superiore mense Novembri ivit

In Bibliotheca Nationali Neapolitana plures Iacobi Leopardi litterae autographae ac pretiosi codices minutis picturis splendide exornati, inter quos Librum Horarum Alphonsi regis Aragonum usui et Horas Beatae Mariae Virginis memorare potissimum oportet, quattuor abhinc dies publice expositi sunt. Summi poetae, philosophi, scriptoris philologique Recinetensis epistula, quam sua manu Bononiae die XVIII mensis Decembris anno MDCCCXXVIII scripsit et ad Carolum Emmanuelem comitem Muzzarelli, Sacrae Rotae auditorem, academicum magnique nominis hominem litteratum, nimirum misit, praeterea est primum exhibita.

Quae vero, a Parthenopaeae Bibliothecae administratoribus superiore mense Novembri apud Romanam auctionum domum “Finarte” octo milibus euronummorum empta, studii temporibus illis ardentis pro Italorum libertate recuperanda sinceraeque patriorum carminum Leopardianorum admirationis, qua liberales incensi erant, praeclarum dat testimonium.