Anomalia, fabula romanica ab Herveo Le Tellier egregie composita domusque editoriae Gallimard typis die XX superioris mensis Augunti impressa, maximo litterarum Francogallico praemio, quod ex Edmundo et Iulio Huot de Goncourt, fratribus scriptoribusque clarissimis, nomen trahit, est heri ornata. Cuius auctor, sexaginta tres annos natus, omnes alios concertatores, qui certamina exclusoria vicerant, longe superavit.
Opus hoc laureatum, in linguam Italicam conversum, a domo editoria, cui Thesei Navis (vulgo La nave di Teseo) titulus, proximi anni mense Februario sane publicabitur.