O tempora, o moresSchwarzenegger Trump ducem vanum pessimumque omnium praesidentem appellat

Per visificum nuntium interretialiter vulgatum celeberrimus actor, quondam Californiae gubernator a Factione Republicana, Americani Capitolii oppugnationem Nocti Crystallorum quoque comparavit

Oratio Schwarzeneggeriana, quinque post dies habita quam seditiosi Vasingtoniae Capitolium aggressi erant, firmissima facinoris illius gravissimaeque Donaldi Trump culpae vituperatio omni tempore memorabitur. Per visificum namque nuntium, in Prosopobiblio (vulgo Facebook) heri publicatum, inclutus histrio, palaestrita trophaeo “Olympia” ad disciplinam physicam septies decoratus ac Factionis Republicanae fautor, qui Californiae gubernatoris munus annis MMIII-MMXI obivit, quadragesimum quintum Domus Albae inquilinum ducem vanum pessimumque omnium praesidentem Boreoamericanum sane appellavit.

Schwarzenegger, barbaros aggressores potissimumque eversivi conventiculi “Feroces Pueri” (Anglicis verbis Proud Boys) sodales ut novos nazistas praeterea describens, Americani Capitolii oppugnationem cum saevis vastationibus, ab Hitlerianis inter dies IX-X mensis Novembris anno MCMXXXVIII effectis ac nomine Noctis Crystallorum maeste notis, quoque aequavit.