Hesterno die, cum magni Statunitenses electores in sententiam pedibus ituri atque Iosephi Biden victoriam punctis longe plurimis confirmaturi essent, Donaldus Trump insulsis perniciosisque verbis animos calefacere non destitit Qui vero in percontatione televisifica cum Briano Kilmeade, controversioso stationis emissoriae capularis “Vulpis Notitiae” (Anglice Fox News) diurnario, Democratas suffragiorum ambitus denuo accusavit, non legitimi Foederatarum Americae Civitatum praesidis periculum indicavit ac dimicationem nullo modo perfici sane nuntiavit. Trump exprobrationes in iudices supremos, qui Generalis Texiae Procuratoris appellationem nudius tertius reiecerant, postremo insane iteravit.
14 Dicembre 2020
