In urbe Trurone, Cornubiensis comitatus capite, Ioannes le Carré, valetudine ad breve tempus affectus, de vita abhinc quattuor diebus migravit: Dorcestriensis summi nominis scriptor, cui verum nomen David Ioannes Moore Cornwell, undenonaginta annos nimirum excesserat. Qui, post quattuor annos (MCMLX-MCMLXIV) quam Munerum Secretorum Britannorum emissarii officium expleverat, sicuti fabularum auctor speculatoriarum universalem sibi gloriam et honorem acquisivit.
Anno MCMLXI le Carré Georgium Smiley, personam exploratoris occulti, a Iacobo Bond omnino diversi, imaginem repraesentantem, nimirum confinxerat. Cuius inter innumeros libros Emissarius qui a frigidis partibus venit (Italice La spia che venne dal freddo) ac Talpa potissimum memorentur oportet.
