In urbe Roma Donatella Raffai, quae adversa iam diu valetudine laborabat, extremum spiritum, LXXIX aetatis anno suae nondum exacto, heri effudit. Quem decessum Silvius Maestranzi, eius maritus ac retis televisifici RAI quondam moderator, fracto animo nuntiavit. Donatella Raffai magnam sibi laudem peperit omniumque volutantem conciliavit ut diurnaria televisifica ac praesertim nuntiatrix telehoramicae emissionis “Quis eum vidit?” (Italice Chi l’ha visto?) inscriptae, quam una cum Paulo Guzzanti anno MCMLXXXIX prima duxit. Cuius nomen Friderica Sciarelli, quae inde ab anno MMIV praedicti telehoramatis moderationem suscepit, per nuntiolum in Pipiatorio scriptum est grate prosecuta.