Virus Coronarium magis magisque saevit in Civitatibus Foederatis Americae, ubi plus quam decies centena milia hominum et quadringenta milia morbum contraxere ac tantummodo hesterno die novorum infectorum numerus viginti milium septingentorum duodecim fuit. Attamen Donaldus Trump vult quam celerrime vastissimam regionem illam, cuius es praeses, iterum aperire. «Civitatibus Foederatis Americae necesse est – sic heri ipse assevit – quam primum ad normalitatem reverti. Et tales existimare Civitates Foederatae Americae non potero praesertim donec scholae clausae erunt».
Haec verba Trump dixit ut novissimas Antonii Fauci declarationes commentaretur eodemque responsum redderet. Die Martis celeberrimus immunologus, qui est inter peritos Consilii Domus Albae de Coronarii Veneni propagatione continenda, enim affirmaverat: «In discrimen magnum venimus, immature rursus incohando omnes activitates etiam scholasticas. In multiplicium epidemiarum periculum nos ita committimus». Quis igitur recte dixit? Trump, qui in crise epidemica sustinenda retardationes et errores innumeros fecit, aut Fauci, qui est immunologus internationalis famae?