Papa Franciscus, dominicarias persalutationes sueto more impertiens post marialem precationem a verbis Angelus Domini incipientem, quam in Palatii Apostolici Bibliotheca recitaverat, se annuam Diem Mundialem instituere Avorum Senumque die dominica IV mensis Iulii ubique terrarum celebrandam hesterno die nuntiavit. Quam dominicam Summus Pontifex sane elegit prout sanctorum Ioachim et Annae, Iesu “avorum”, memoriae proximam.
«Avi generationes – sicut Papa Franciscus in salutatoria allocutione dilucide ait – inter se coniungunt ac nectunt, qui iunioribus vitae experientias et fidei tradant». Omnes ceterum sciunt quaestionem de tertia aetate senibusque custodiendis Romani Pontifici curae potissimum esse.
